Ракометна репрезентација

Вчерашниот пораз против Данска е веќе минато и мислите се насочени кон остатокот од ЕП. Пред истиот меч, имавме можност да погледнеме дел од репрезентативците во сосема поинакво светло во Еден на Еден.

Нова серија фб/твитер прашања, пародија на рекламата за вода со Кире Лазаров, интересна идеја за тоа како би можела да изгледа кампањата за популаризирање на скијањето кај пензионерите и супер муабети со Миркуловски, Диви, Ангеловски и Митков. Сето тоа беше дел од епизодата од сезона 5 посветена на ракометот.

Први со Жаре муабетеа “домашните” репрезентативци, Филип Миркуловски и Петар Ангелов. Се зборуваше за анегдотите од подготовките пред ЕП како моментот кога цел автобус отишол на тренинг за кога стигнале да видат дека го заборавиле Дејан Пецаковски, големиот успех на ЕП 2012 и тоа што се случувало во соблекувалните во тешките моменти, свадбата на Наумче Мојсовски каде присустен бил голем дел од репрезентацијата итн.

Се разговараше и за тоа зошто Жути сеуште игра во Македонија, а не во странство. “Имав една сериозна понуда од шпанскиот Гранолерс. Ја одбив и останав тука. Ракометот е најплатен спорт кај нас. Се стигнува и до плата од 7-8000 евра и добро се заработува” – искрен беше Миркуловски.

Интернационалците во репрезентацијата пак, Бранислав Ангеловски и Влатко Митков споделија многу интересни искуства од странската кариера. Влатко зборуваше како е во Австрија и Германија, а Бранислав пак раскажа како на шега започнал разговор за да оди да игра во Обединетите Арапски Емирати, но на крај таму навистина поминал една година за која заработил како за две-три играјќи во најдобрите македонски клубови. Популарниот Бранче сподели и искуства од животот заедно со Кире Лазаров во Загреб. Како доцнеле на утрински тренинг, па Кире го нашол како спие во тоалетот и како хрватските полицајци честопати знаеле да им прогледаат низ прсти благодарејќи на нивната популарност.

“Возев 140 каде што беше дозволено 60. Полицаецот ме виде и ми рече – не се секирај, и Кире сега помина тука. Знам дека се брзате”, низ смеа раскажува Бранче.

Вчерашната епизода се заврши со партија пантомима во познавање на соиграчите од репрезентацијата. Се “пресметаа” Жути и Диви против Бранислав и Влатко.

Слични статии