Од нокаутот на Перо, до свадбите на Амди: Најинтересните моменти во 1на1 во 2019
![](https://www.edennaeden.mk/wp-content/uploads/2019/12/IMG_9241.jpg)
Почнавме јако, со Перо Антиќ, тој ни ја отвори оваа 11 сезона на Еден на Еден. Перо откри како го нокаутирал Леброн Џејмс, изигра „Безобразни карти“ со Жаре и раскажа многу анегдоти од времето на НБА, а зборуваше и за своите синови.
![](https://www.edennaeden.mk/wp-content/uploads/2019/12/73403987_10157857915158679_1176660372967391232_o-1024x1024.jpg)
На истото снимање со Перо, имавме тројца гости од Србија, раперите Раста, Римски и Корона, а скопски домаќин им беше Таско. Токму Таско, без проблем прочита неколку злобни коментари за него, во свој стил одговори на нив, а Раста зборуваше и за разводот со пејачката Ана Николиќ.
![](https://www.edennaeden.mk/wp-content/uploads/2019/12/75371531_10157878782198679_8270639340166578176_o-1024x1024.jpg)
Трета среќа и една боемска, мераклиска емисија со Драган Спасов- Дац и со Александар Митевски. На истото снимање ни дојдоа и нашите пријатели, тамбурашите „Гезме“ за хитот „Уште ми фалиш“ да звучи уште побогато. Дац раскажа како е да се глуми на иста сцена со Никола Груевски.
![](https://www.edennaeden.mk/wp-content/uploads/2019/12/dac--1024x1024.jpg)
Откако ги испративме Дац и Митевски, започна шоуто. Четвртата епизода ја снимаше Амди Бајрам. Изјави дека Сашо Мијалков после Бранко Црвенковски е најдобар за во кафана, вртеше тркало на среќата и ги опишуваше политичарите, и раскажа за сите свадби и сунети на децата и на внуците кои ги организирал на копно, во воздух и под вода.
![](https://www.edennaeden.mk/wp-content/uploads/2019/12/amdi-1024x1024.jpg)
Младите глумци од филмот „Врба“ направија парче. Сара Климоска и Никола Ристески рапуваа како професионалци, а Наталија Теодосиева иако со скинати хулахопки, изигра мини џез балетска точка. Младите актери ги засили нивниот поискусен колега, Благој Чоревски- Чоре кој има епизодна, но ефектна улога во филмот на Милчо Манчевски.
![](https://www.edennaeden.mk/wp-content/uploads/2019/12/vrba-1024x1024.jpg)
Глумците од „Фамилијата Марковски“ ни беа гости во шестата епизода. Александар Микиќ раскажа дека создал друштвена игра, Силвија Стојановска за прв пат прозборе за внукот Ненад од ќерката Јана, а Петар Петковски покажа дека е музички талентиран.
![](https://www.edennaeden.mk/wp-content/uploads/2019/12/markovski-1024x1024.jpg)
Влатко Лозаноски- Лозано ни е секогаш драг гостин. Расположен за муабет како никогаш до сега, раскажа како го ограбиле, од што се плаши, ама и низ игра ги погодуваше нозете на своите колешки. „Љубојна“ ни беа добри музички гости во истата епизода.
![](https://www.edennaeden.mk/wp-content/uploads/2019/12/lozano-1024x1024.jpg)
Студиото никогаш не ни било толку весело како на снимањето со децата од „Дајте музика“ и со тинејџерите од „Гласна куќа“. Песни, смеење и сите таленти од малите, но големи актери ги видовме во таа епизода.
![](https://www.edennaeden.mk/wp-content/uploads/2019/12/dajte-muzika-1024x1024.jpg)
Последното снимање од годинава што изминува беше со Благој Веселинов и со Дејан Лилиќ. „Попара“ ја нарече оваа емисија самиот Дејан Лилиќ, и во право е. Секој муабет со глумците од „Дедо и внук“ беше со многу смеење, а го зачинија анегдотите на Маријан Ѓорѓиевски, особено онаа кога на иста девојка ѝ се пуштале со Благој. Министерката за финансии Нина Ангеловска и директорката на УЈП Сања Лукаревска читаа злобни твитови за апликацијата МОЈ ДДВ.
![](https://www.edennaeden.mk/wp-content/uploads/2019/12/l-i-b--1024x1024.jpg)
Крајот ја краси годината, а тоа е Игор Џамбазов. За својата прва љубов, за своето прво и последно летување во Грција кога од соба не излегол девет дена, за сите свои песни и блуз патувања, раскажа нашиот пријател Иги, во специјалната, новогодишна емисија.
![](https://www.edennaeden.mk/wp-content/uploads/2019/12/igi--1024x1024.jpg)
За малку, шоуто ќе го узурпираше Жарко Збрефтов, кој неколку пати се појави и во оваа сезона. Не се заборава ни „ексклузивното интервју“ на Збрефтов со Катица Јанева. И секако нашиот втор домаќин Мешевски.
![](https://www.edennaeden.mk/wp-content/uploads/2019/12/IMG_0072-1024x1024.jpg)
А Жаре? Тој беше и пејач на хитот за „Принц Али“, и танчар и портпарол на благајната на СЈО…
![](https://www.edennaeden.mk/wp-content/uploads/2019/12/IMG_9215-1024x1024.jpg)
Ви благодариме што бевте со нас и оваа година. Продолжуваме со забава и со убави гости и во 2020.
М.Џаровска